Veiðin fyrir norðan hefur verið góð að undanförnu, bæði í Runukvísl/Hofsá og á Kolkusvæðinu. Töluvert magn af fiski er komið upp í árnar og enn er fiskur að ganga.
Við höfum fengið góðar fréttir frá báðum svæðum og margar fallegar bleikjur hafa komið á land og í Kolku hafa einnig verið að veiðast lax og sjóbirtingar.
Bleikjan í Runukvísl
Bleikjan hefur verið að ganga upp í Runukvísl í sumar og talsvert af fiski er komið á svæðið. Veiðin hefur verið fín síðustu daga og enn er fiskur að bætast við.
Leiðsögumaðurinn okkar, Robert Hanson, tók myndirnar að neðan. Þar má sjá bæði fallega fiska og það sérstaka landslag sem umlykur Hofsá og Runukvísl.
Svæðið hentar vel þeim sem vilja leggja aðeins á sig, ganga inn í náttúruna og njóta veiðinnar fjarri amstri dagsins.
Kolka
Fjölbreytt veiði í Kolku
Veiðin á Kolkusvæðinu hefur einnig verið mjög góð að undanförnu. Þar er bleikjan mest áberandi, en laxar og sjóbirtingar hafa einnig verið að veiðast.
Kolka, Hjaltadalsá og Kolbeinsdalsá bjóða upp á fjölbreytta veiði og skemmtilega möguleika á fleiri en einni tegund. Myndirnar í seinna myndasafninu eru úr veiðinni þar undanfarið og gefa góða mynd af því sem svæðið hefur uppá að bjóða.
