Blönduós

Blanda er ein af þessum stóru þegar það kemur að laxveiðiám Íslandi og er jafnramt í hópi þeirra fremstu og bestu. Blanda er þekkt fyrir miklar aflahrotur en veiðin hefur sveiflast mikið á síðastliðnum áratugum og hefur veiðin farið upp í hæstu hæðir sum ár. Laxinn í Blöndu er snemmgenginn stórlaxastofn sem byrjar að ganga í maí og svo verða göngurnar kröftugri þegar kemur fram í júlí.

Þegar líða tekur á sumarið er það nánast árviss viðburður að Blöndulón fyllist og jökulvatn flæðir yfir stífluna, þá er talað um að Blanda sé komin á yfirfall. Það koma þó ár sem að þetta gerist ekki og þá er hægt að veiða ána út tímabilið. Einnig getur það gerst að vélar séu sérstaklega keyrðar í Blönduvirkjun og þá getur áin gruggast. Fish Partner getur ekki tekið ábyrgð á ástandi árinnar þegar menn eru við veiðar.
Veiðisvæðin í Blöndu eru fimm talsins.

Blönduós

Svæðið nær frá ós og upp að klöppum neðan við lögreglustöð þar sem gætir flóðs og fjöru. Hér er um að ræða silungasvæði sem opnar í maí. Hér geta veiðimenn átt von á sjóbleikju og sjóbirting sem flækist inn og út á fallaskiptum. Svæðið hefur ekki verið í skipulagðri sölu áður en heimamenn vita að þar getur verið feikna góð veiði.