Langavatn á Héraði

Langavatn er skemmtilegt veiðivatn staðsett í Norður Múlasýslu. Vatnið er í um 108 metra yfir sjávarmáli. Vatnið er steinsnar frá Egilstöðum og því upplagt að renna fyrir fisk þar þegar farið er um svæðið. Aðgengi er gott og fært öllum bílum en þó ekki á vorin á meðan frost er að fara úr jörðu. Bæði urriði og bleikja veiðist í vatninu og er veiðin talin best fyrripart sumars. Vænn fiskur veiðist í vatninu eða allt að sex pund en mest eru þetta góðir matfiskar um 1,5 -2 pund. Umhverfið er ægifagurt og margt að skoða og sjá á svæðinu. Ýmsar sögur eru til af svæðinu og er ein þeirra af henni Staffells Möngu en hún var kona sem drukknaði í Langavatninu og gekk svo aftur og fylgdi Staffellingum og gerði vart við sig áður en þeir komu á aðra bæi. Frá henni segir áreiðanlega í þjóðsögum Sigfúsar Sigfússonar.

Leiðarlýsing

Vegalengd frá Reykjavík er um 630 km og um 8 km fá Egilsstöðum. Beygt er inn Fellaveg af þjóðveginum og ekið þar um 15 km, þaðan beygt til vinstri og þá eru um 500 metrar að vatninu (sjá frekari útskýringar á korti).

Veiðisvæðið

Svæðið sem heimilt er að veiða á er vesturbakki í landi Staffells og skulu veiðimenn virða mörkin. Sjá betur á korti.

Veiðitími

Heimilt er að veiða frá því að ís leysir og til og með 30. september. Veiði er heimil allan sólarhringinn.

Reglur

Veiðimenn skulu gera grein fyrir sér með því að hringja eða senda skilaboð til veiðivarðar.
Einnig skal láta hann vita af aflabrögðum að veiði lokinni.
Hundar leyfðir: Já, passa skal að hafa þá innan sjónmáls.
Notkun báta: Kajak og bellý bátar leyfðir en ekki stærri báta.
Netaveiði: Nei
Tjalda: Ekki heimilt vegna friðaðs skóglendissvæðis en stutt er í skipulögð tjaldsvæði við Egilsstaði
Umsjónarmaður/veiðivörður: Eiríkur Egill Sigfússon. S: 863 5616