Fellsendavatn

Fellsendavatn er í um 170 km fjarlægð frá Reykjavík og í aðeins 19 km fjarlægð frá Hálendismiðstöðinni Hrauneyjum. Þetta er fyrsta vatnið sem komið er að þegar keyrt er til Veiðivatna frá Hrauneyjum, en í vatnið var sleppt urriðaseiðum sem hafa fengið að dafna. Aðgengi að vatninu er gott og hægt að keyra nánast alveg að bakkanum. Þó skal fara varlega á smærri bílum að festa sig ekki í sandinum. Helstu veiðistaðir eru við ströndina að norðan, en hægt er að ganga inn með vatninu að austan og vestan og getur það gefið góða veiði líka.
Leyfilegt agn í vatninu er fluga, maðkur og spúnn. Daglegur veiðitími er frjáls en þó ekki lengur en 12 klukkustundir á dag.
Sá litli gróður sem er í kringum vatnið er mjög viðkvæmur og biðjum við veiðimenn að ganga vel um náttúruna. Á hverju sumri er mikið magn urriðaseiða sleppt í vatnið til að viðhalda stofninum.

Í Fellsendavatni leynast stórir urriðar en veiðin getur verið sýnd en ekki gefin. Þeir sem veiða á flugu hafa yfirleitt gert bestu veiðina í miklum vindi eða seint á kvöldin og nóttinni. Veiðin getur verið mjög erfið í stillu og góðu veðri þegar urriðinn virðist halda sig á dýpi fjær bökkunum.

Veiðifélagar veiða frítt í Fellsendavatni