Xingu Lodge-Brasilía

Hvar

Xingu áin er staðsett í suðaustur hluta Amazon frumskógarins, á miðju verndarsvæði Kayapo frumbyggjana. Veiðisvæðið sem tilheyrir Xingu ánni er eitt það allra fjölbreyttasta á jörðinni og fjöldi tegunda sem veiðimenn geta komist í kynni við nær óteljandi. Svæðið er gríðarlega stórt en ársvæðið teygir sig í gegnum yfir 250 km. Það er því nóg pláss til að veiða!

Veiðin

Tegundirnar eru gríðarlega margar sá fiskur sem flestir vilja veiða er Payara. Þessi fiskur er það sem alvöru rándýr og er þekktur fyrir gríðarstórar tennur sem mörgum finnast hálf ófrýnilegar. Þessir fiskar ná reglulega yfir 20 pund og eru þekktir fyrir að vera gríðarlega sterkir, og virkilega skemmtilegir að veiða á stöng.

Fyrir utan Payara má nefna Wolfish, Peacock Bass, Bicudas, Matrinxas, Pacu ásamt ótal öðrum tegundum.

Veiðihúsið

Veiðihúsið við Xingu ána samanstendur af 4 tveggja manna húsum, ásamt samkomuhúsi þar sem gestir koma saman að borða og kynnast.

Þeir sem að rekstri veiðihússins koma leggja mikið upp úr því að gestir fái að kynnast því besta í alþjóðlegri matargerð, ásamt því að kynnast þeim lystisemdum sem kunna að leynast í nágrenninu. Það verður því enginn svikinn af veitingunum sem eru í boði við Xingu.

Búnaður

Stangir
Einhendur fyrir línu 6 – 10 eru vinsælastar. Gott er að 2-3 stangir uppsettar fyrir mismunandi línuþyngdir. Þannig er hægt að bregðast hratt við breyttum aðstæðum. Gott að vera með öflugar stangir með töluverðu bakbeini (backbone) til að takast á við marga af þeim stóru fiskum sem verið er að elstast við.

Hjól
Fluguhjól sem þola salt eru nauðsynleg. Bremsan þarf að vera sterk og “dragið” fremur mjúkt. Við mælum með að taka með hjól sem þú þekkir vel og treystir. Undirlína skal ekki vera undir 50 pundum í styrkleika.

Línur
WF Flotlína sem er hönnum fyrir veiði í hitabeltinu sem og saltvatni er málið. Einnig er gott að hafa nokkra mismunandi sökkenda í töskunni. Mælt er með 24ft löngum enda, í sökkhraða 300 – 450 grain. Athugið að það er nauðsynlegt að vera með línur sem þola veiði í töluverðum hita. Línurnar sem við notum á Íslandi eru fljótar að verða ónothæfar í þessari veiði.

Taumefni
Fiskurinn á þessu svæði er yfirleitt ekki taumstyggur. Þrátt fyrir það er ágætt að vera með flúrócarbon taumefni þar sem það geta komið upp aðstæður þar sem veitt er í kristal tæru vatni og þá er betra að vera með allt á hreinu. Gott er að hafa nokkra mismunandi styrkleika með sér. Frá 16lbs – 50lbs

Flugur
Til þess að veiða Payara þarf flugan að vera nokkuð mikið “dressuð” og hafa mikla hreyfingu í vatninu. Ekki er óalgengt að þessar flugur séu 12 – 30 cm langar. Gott er að notast við svokallaðann “trailer hook” í flugunum þar sem Paraya eru þekktir fyrir að ráðast á bráðina aftan frá. Aðrar vinsælar flugur eru t.a.m Saltwater popperar, Chernobyl maurar o.fl. Við hjá Fish Partner hjálpum þér að velja réttu flugurnar í ferðina.

Tímabil og Ferðaplan

Tímabil
Veiðitímabilið nær frá seint í Maí og til loka Nóvember.

Ferðaplan
Flogið er til Manaus International Airport og þaðan haldið áfram til Xindu. Flogið er beint til Manaus frá eftirtöldum borgum:

Miami
Panama City
Lisbon
Rio de Janeiro
Sao Paolo

Þegar komið er til Manaus mun bílstjóri frá Xindu sækja hópinn á hótel (Innifalið í verði) og keyra á innanlandsflugvöll. Þaðan er flogið í einkaflugvél til þorpsins Pukararankre sem stendur á bökkum Xindu árinnar. Flugtími er áætlaður um 3.5 klukkustundir.

Dvalarplan

Dagur 0

Þetta er dagurinn í Manaus. Hótel í Manaus er innifalið í verðinu.

Dagur 1

Hópurinn borðar morgunmat á hótelinu í Manaus og er svo sóttur klukkan um 05:30 og keyrður út á flugvöll.

Þegar komið er til Pukararankre er stutt “meet & greet” þar sem er farið yfir menningu Kayapo frumbyggjana sem hafa yfirráð á svæðinu. Þá er einnig farið létt yfir hvernig vikan framundan er skipulögð. Þegar þessu er lokið er haldið sem leið liggur í veiðihúsið og þarna gefst veiðimönnum gott tækifæri á að sjá hluta af þessu gríðarlega fallega veiðisvæði. Þegar komið er í húsið kemur fólk sér fyrir og slakar á fyrir átökin framundan. Ekkert er veitt í dag.

Dagur 2- 7

05:30 – Kaffið er orðið klárt

06:30 – Morgunmatur

07:00 – Haldið til veiða

12:00 – 14:00 – Hádegismatur í veiðihúsinu

14:00 – Haldið aftur til veiða

18:00 – Komið aftur í hús

19:00 – Kokteilar og forréttir

20:00 – Kvöldmatur

Í hverjum bát eru tveir veiðimenn ásamt enskumælandi leiðsögumanni sem og leiðsögumanni frá Kayapo ættbálkinum. Engir þekkja umhverfið betur en heimamenn og því er mikill fjársjóður fólginn í því að hafa þá með í bátnum. Bátarnir eru útbúnir þannig að báðir veiðimenn geta veitt samtímis og er unnið hörðum höndum að því að skipuleggja daginn þannig að sem allra mestur veiðitími náist.

Dagur 8

Eftir morgunmat eru gestir fluttir með bát til Pukararankre, þaðan sem flogið er til Manaus. Ætla má að hópurinn sé kominn til Manaus seinnipartinn sama dag.