Vatnamót

Vatnamótin í Skaftárhreppi eru í Vestur-Skaftafellssýslu í um 285km fjarlægð frá Reykjavík, en einungis 12 km fjarlægð frá Kirkjubæjarklaustri. Veiðisvæðið sjálft er um 8 km sunnan við þjóðveginn sjálfann. Útsýnið frá Vatnamótum er glæsilegt, bæði til fjalla og jökla.

Þetta er gríðarlega stórt veiðisvæði og hefur löngum verið rómað fyrir að vera með þeim gjöfulustu á landinu, en um er að ræða ýmsar ár og læki sem sameinast og renna niður sandana og sameinast Skaftá. Meðal þeirra eru Fossálar, Breiðabakkakvísl og Hörgsá.

Uppistaða veiðinnar í Vatnamótum er sjóbirtingur sem er frægur fyrir stærð sína, en fiskar um 20 pund og yfir veiðast árlega. Oft eru það sjóbirtingarnir í Vatnamótum sem eru þeir stærstu sem veiðast á landinu. Einnig veiðist árlega töluvert af bleikju og laxi.

Veitt er á fimm stangir í Vatnamótum út tímabilið sem nær frá 1. apríl til 20. október ár hvert.

Veiðistaðir eru fjölmargir, enda um stórt veiðisvæði að ræða. Þar sem mestmegnis er um að ræða sandbotn þá getur hann verið síbreytilegur, og því verða veiðimenn að leita uppi álitlega staði. Þó er hægt að veiða frá bakkanum á um ca 5 km kafla.

Aðkoman að veiðisvæðunum er nokkuð góð og hægt er að nota fólksbíla alveg niður að bökkum. Þó er ekki ráðlegt að fara á efstu og neðstu svæðin án þess að vera á fjórhjóladrifsbíl.

Til að komast niður að veiðisvæðunum er beygt til hægri við Hraunból, rétt austan við Fossála.

ATH. Veiðimenn eru hvattir til að fara varlega um vegna sandbleytu og nota björgunarvesti

Veiðihús:

Veiðihúsið er í Hörgslandi. Húsið er ekki stórt en gisting er fyrir samtals 6 manns.

Hægt er að leigja auka hús vilji menn láta fara betur um sig.