Norðlingafljót

Norðlingafljót

Norðlingafljót á upptök norðan Langjökuls og rennur þaðan um 70 km til vesturs í Hvítá. Mikil náttúrufegurð er við fljótið og telja margir veiðimenn það vera eina fegurstu veiðiá landsins. Umhverfið er margbreytilegt og veiðistaðir mjög fjölbreyttir. Fljótið rennur um hina rómuðu Arnarvatnsheiði sem er án efa eitt allra gjöfulasta silungsveiðisvæði landsins. Fjölmargir lækir renna til fljótsins úr vötnum heiðarinnar.

Í fljótinu er bæði urriði og bleikja og er meðalstærð í hærri kantinum. Stærsti fiskur sem vitað er til að veiðst hafi í fljótinu fram að þessu var fimm og hálft kíló. Algeng stærð á urriða eru tvö til sex pund og bleikjan er oft á bilinu tvö til fjögur pund. Þó er töluvert af stærri fiskum í fljótinu.

Veiðisvæðið nær frá upptökum fljótsins niður að Bjarnafossi. Hluti svæðisins er vel aðgengilegur á bíl en stór hluti krefst göngu og því meira sem veiðimenn eru til í að ganga, þeim mun betri árangri má búast við.

Hægt er að fá svefnpokapláss í Álftakróki sem er skáli á bökkum fljótsins. Þar er rennandi vatn og salerni. Skálinn er með eldhúsi með gasi og er allur helsti borðbúnaður til staðar ásamt gasgrilli.

TIL ATHUGUNAR

• Eingöngu er veitt á flugu í ánni og skal öllum fiski sleppt skilyrðislaust.
• Skráið afla í veiðibókina áður en haldið er heim. Veiðibókin er staðsett í póstkassa við brúna.
• Akið ekki utan vega.
• Veiðifélagið ber ekki ábyrgð vegna tjóns sem búsmali veldur á ökutækjum.
• Veiðisvæðið nær frá upptökum fljótsins niður að Bjarnafossi.
• Meðferð skotvopna er bönnuð við ána.

Veiðifélagar Fish Partner fá 5% endurgreiðslu í formi Veiðikróna við kaup á leyfi í Norðlingafljóti í vefsölu.

Veiðifélagar Fish Partner fá 10% afslátt af veiðileyfum í Norðlingafljóti í vefsölu.